OP ENS | Hans Mellendijk

Op ens

Mangs uut ’t niks kwam e d’ran

Mangs uut ’t niks löp daor ’n beest

Mangs uut ’t niks was daor de smacht

Mangs uut ’t niks ging e mooi liggen

Mangs uut ’t niks kwam daor de trein

Mangs uut ’t niks schot e zich deur ’t knie

Mangs uut ’t niks lag e in gruzzelementen

Mangs uut ’t niks ’n wagen van rechts

Mangs uut ’t niks wa’j daor in 't lech

Mangs uut ’t niks sneeuwen 't wit

Mangs uut ’t niks ondeugd in de gedachte

Mangs uut ’t niks trok e ’t geweer

Mangs uut ’t niks zag e ’t beeld

Mangs uut ’t niks ’n bokstessegesprek

Mangs uut ’t niks grip ’t ni-js mi-j bi-j de kael

Mangs uut ’t niks zwelt dri-jmaol ’t gejoel

Mangs uut ’t niks klonk daor ’t schot

Mangs uut ’t niks geld op de rekkening

Mangs uut ’t niks n dònderslag bi-j heldere hemel

Mangs uut ’t niks ’n gedicht gebrouwen

Mangs uut ’t niks de bocht uut evlaogen

Mangs uut ’t niks in de armen van ’n ander

Mangs uut ’t niks de zwaluw op ’n draod

Mangs uut ’t niks bu’j d’r

Mangs uut ’t niks kust de bokser zien tiggenstander

Mangs uut ’t niks scoort de midveur ’n goal

Mangs uut ’t niks piept ’t oor zien melodie

Mangs uut ’t niks uut de tied

Op ens

Niks!

Gepubliceerd in De Moespot | 61ste jaorgang no. 257 | meert 2018